صلاح الدين خان ليث محمد نيبالي
مركز الصفا الإسلامى ، روپندیہى صوبہ لمبنی ، نيبال

حج سیزن 1444ھ 2023ء اور سعودی عرب کی اعلی خدمات و انتظامات
مملکت سعودی عرب کا نام ذہن میں آتے ہی مسلمانان عالم کو خوشی ہوتی ہے.حرمین شریفین کی زیارت کے لئے ان کے دلوں میں پاکیزہ اور مقدس ماحول سامنے آجاتا ہے 
مملکت سعودی عرب کا بنیادی مقصد قرآن وسنت سے رہنمائی حاصل کر کے ملک کو استحکام کا گہوارہ بنانا اور مسلم معاشرے کو اقوامِ عالم میں عزت و وقار سے روشناس کرانا ہے۔ سعودی عرب دنیا کا واحد ملک ہے جس کا دستور قرآن وسنت ہے اور وہاں کے حکمرانوں کا مقصد نظام اسلامی کا قیام اور مسلمانان عالم کے لئے ملّی تشخص کا جذبہ ہے۔
سعودی عرب حکمران آل سعود حفظہم اللہ نے امت مسلمہ کی دینی سماجی امدادی جو خدمات انجام دی ہیں وہ تاریخ کاایک روشن باب ہے 
سعودی عرب کی سب سے نمایاں اور عظیم الشان خدمات حرمین شریفین کی توسیع اور نگرانی ہے ۔وہ بڑے عظیم لوگ ہیں جو دن رات حرم مکی اور حرم مدنی کی خدمت و نگہبانی کرتے ہیں اور ان کی توسیع، طہارت و نظافت اور ضیوف الرحمن کی خدمت میں دن رات کوشاں رہتے ہیں اور یہ ان کے تقویٰ اور پرہیزگاری کی دلیل ہے جیسا کہ قرآن کہتا ہے :   وَمَنۡ يُّعَظِّمۡ شَعَآئِرَ اللّٰهِ فَاِنَّهَا مِنۡ تَقۡوَى الۡقُلُوۡبِ ۞
حرمین شریفین کی زیارت کرنے والے حجاج کرام اور معتمرین جو دنیا کے کونے کونے سے حاضر ہوتے ہیں جب وہ ان مقدس اور متبرک شہروں میں جاتے ہیں تو حرمین کی توسیع اور اس کی خوبصورتی کو دیکھتے ہیں تو بے اختیار آل سعود حفظہم اللہ یعنی خادم حرمین شریفین کی تعریف کرنے پر مجبور ہو جاتے ہیں کہ انہوں نے کتنی محنت، لگن اور محبت سے ان کو خوبصورت بنانے کی سعی و کوشش کی ہے۔
خادم حرمین شریفین نے ان مقامات کی زیارت کرنے والوں کے لئے بنیادی سہولتیں اور انکے مکمل تحفظ کا خیال رکھا ہے تاکہ ضیوف الرحمن اور معتمرین کو کسی قسم کی پریشانی نہ ہو بلکہ حجاج کرام مناسکِ حج ادا کرنے کے لئے جن مقامات مثلاً منیٰ، مزدلفہ اور عرفات جاتے ہیں وہاں بھی ان کا تمام جدید آلات کو بروئے کار لاتے ہوئے ان کا بھر پور خیال رکھا گیا ہے اور ہر ممکن اعلی ترین سہولیات فراہم کی جاتی ہے۔  بلکہ اگر عادلانہ موازنہ کیا جائے تو قرون مفضلہ کے بعد سے کسی بھی حکومت نے آل سعود حفظہم اللہ کی طرح حرمین شریفین کی توسیع اور عقیدہ توحید کی اشاعت نہیں کی۔ اسی لئے دنیا بھر کے مسلمان خادم حرمین شریفین سے بے پناہ محبت کرتے ہیں سعودی عرب کی ترقی و خوشحالی کو اپنی ترقی و خوشحالی سمجھتے ہیں۔
واضح رہے کہ رواں سال 1444ھ2023 میں پوری دنیا کے 90 ممالک سے 1300 سے زائد بااثر مسلمانوں کو سعودی حکومت اپنے خرچ پر حج بیت اللہ کرانے کی عظیم سعادت حاصل کر رہی ہے۔ اور انہیں مملکت توحید سعودی عرب کے بادشاہ خادم حرمین شریفین سلمان بن عبدالعزيز / حفظہ اللہ ورعاہ کے خصوصی مہمان ہونے کا شرف حاصل ہورہا ہے، مملکت توحید کی جانب سے متعین افراد انتہائی مخلصانہ اور والہانہ انداز میں اللہ کے معزز مہمانوں کا استقبال کرتے ہیں، جگہ جگہ ان معزز مہمانوں کے لئے اچھے کمرے، عمدہ کھانا، مشاعر مقدسہ تک پہونچانے کے لئے لیگژری بسیں، مخلتف زبانوں میں رہنمائی کے لئے علماء اور دعاة اور طلبہ کی تعیین ہی نہیں بلکہ ہر محاذ پر حتی المقدور تعاون پیش کرتے ہیں۔
اسی لئے اس بابرکت موقع پر ہم آلِ سعود خصوصاً شاہ سلمان بن عبدالعزیز اور ولی عہد شہزادہ محمد بن سلمان بن عبدالعزیز و حجاج کرام کی خدمت میں مامور اعیان مملکت سعودیہ عربیہ کو دل کی اتھاہ گہرائیوں سے مبارکباد پیش کرتے ہیں اور بارگاہ رب العالمین میں دست بدعا ہیں کہ اللہ تعالیٰ ان کی زندگیوں میں برکت عطا فرما ، حاسدین اور دشمنان اسلام کی ناپاک سازشوں سے حرمین شریفین اور آل سعود کی حفاظت فرما تاکہ ان کی دور اندیش اور دانشمندانہ قیادت و ہدایات کی روشنی میں وزارت حج حجاج کرام اور معتمرین کی فلاح وبہبود کے لیےتمام انسانی صلاحیتوں اور وسائل کو بروئے کار لاتا رہے

صلاح الدین لیث المدنی 
مرکز الصفا الإسلامي روپندیہی لمبنی نیپال